《絕無轉機》我坐上咗一架盛載住絕望嘅航班。（２４）上集
前情提要──本來，我同埋羽姬佢哋為咗打破崇拜者嘅詛咒，下定決心落機去尋找「啟示病毒」。但喺過程中我俾無臉人整暈咗，差少少就被困喺一個虛構嘅理想鄉裡面。正準備逃脫嘅時候，機緣巧合遇到崇拜者本人，仲成為咗病毒嘅載體……
－－－－－－－－－－
終於返到去機場，當我諗緊應該點去會合其他人嘅時候。發現到羽姬同埋老陶居然就身處喺旅客登記區。唔知係一直等緊我抑或有其他原因先至喺度。
「Rex！」羽姬馬上就注意到我，「呢邊！」
「你哋冇事就好喇……」我行到過去即刻講。
「都唔可以話完全冇事。」講到呢度，羽姬望過去老陶嗰邊。
「嗨。」瞓咗喺座椅上面嘅老陶向我揮揮手，佢睇落好虛弱，腰間經過包紮嘅位置可以睇到有血跡喺度。「好彩我條命夠硬咋，唔係應該冇機會見返你。」
「到底發生咗咩事？」我問嘅時候再望望周圍，「Lincoln同埋阿琪呢？」
見到老陶好似傷得咁嚴重，問完嗰刻好自然會諗咗去一個壞方向。但睇清楚羽姬嘅表情，事情應該未必係非常壞。
＝＝＝＝＝＝＝＝＝＝＝＝＝
《絕無轉機》連載中：
１至２３集：http://bit.ly/2ijVEEd
【植入式廣告】《西營盤》及《絕命上映》已經登錄各大書局！
＝＝＝＝＝＝＝＝＝＝＝＝＝
「佢哋暫時行開咗，」羽姬回答，我注意到佢係一直拎住枝槍，「想睇下搵唔搵到藥去幫老陶止痛。」
「其實冇必要喇……已經好好多。」話雖然咁講，但老陶嘅表情明顯係另一回事。
「你唔好再逞強喇，頭先差少少就真係會死！」羽姬認真咁講，然後再望返我度，「Rex，所有嘢要由我哋分開嗰刻講返。」
我回想返，應該就係過關嘅時候……其實直到而家我腦海都仲係非常混亂，過去同埋現在嘅記憶間唔中都係會炒埋一碟。明明係無耐之前嘅事，但感覺就好似已經過咗幾個月一樣；相反已經過咗好耐嘅事，又好似只係尋日先發生。
「嗰陣阿飛同埋阿彤帶住我哋過關。其實起初真係冇嘢，只係有少少意外估唔到部機會受張身份證……直至入到閘裡面，當我將手指放喺指紋機度……」
講到呢度羽姬忍唔住合埋雙眼，就好似諗返起一段痛苦嘅回憶。
「我突然全身都郁唔到，同時有種好強烈嘅感覺……覺得有幾百對眼望住自己，想避都避唔到。再過多幾秒之後，竟然有個『人』喺我身體裡面分裂出嚟，嗰刻我有種全身被撕裂嘅感覺……但我冇辦法嗌出聲，亦都掙扎唔到。等到嗰個『人』行出嚟，我先意識到佢就係『我』……」
「佢唔係妳。」我打斷咗佢，「而係無臉人……」
究竟無臉人嘅原理係乜嘢？頭先我應該問清楚文啟猶……
「我知……」羽姬點咗下頭，「但嗰陣我只可以眼白白睇住佢行出閘，好怕佢會傷害到你同老陶。」
「當時我即刻就識穿咗佢，但都冇用……下一瞬間我就暈低咗。」我搖搖頭，「跟住呢？」
「閘裡面嘅地板突然打開咗。」羽姬繼續說下去，「好彩並唔係好深，所以跌落去都唔算好傷。但落到去下面我依然係郁唔到……只係見到阿琪同埋Lincoln都喺旁邊……無耐地板就開始郁起上嚟……」
羽姬講到呢度停一停，繼續努力回想返當時發生嘅事。
「……原來身下面係一條運輸帶嚟，唔知郁咗幾耐，我哋由一間黑房出到去一個行李分流區。喺嗰度我見到有好多無臉人排住隊行入一部機裡面，再冇出返嚟……而嗰部機係需要『燃料』運作，而我同阿琪佢哋所身處嘅呢條運輸帶，就係準備運去燃料區嗰邊。」
雖然只係聽，但我已經可以感受到羽姬當時係幾咁無助同絕望。
「本來我真係以為自己死硬，但就喺千鈞一髮之間，有班人趕到嚟救咗我哋。」羽姬講到呢度望向老陶，「係老陶，仲有Fiona，同埋一個從來都未見過嘅陌生男人。」
「Fiona？」我聽完好意外，再望向老陶，「點解你會同佢一齊？」
「我只係好好彩俾佢哋救咗先。」老陶無辜咁講，「之後當然係幫手救Kathy佢哋……」
雖然落機嗰刻已經覺得Fiona唔喺機入面，但嗰陣都係估佢係去咗搵病毒，點諗到佢會係羽姬佢哋嘅救星？
「Fiona救完我之後即刻幫我打咗枝針，幾秒之後我終於郁得返。但旁邊班無臉人馬上就注意到有唔妥，即刻衝上嚟想殺死我哋……本來真係以為走唔甩，直到我……」羽姬垂低頭望向手槍，「……開咗一槍，佢哋就即刻企哂喺度，之後仲開始撤退。但並唔係因為驚，而係有其他原因……」
講到呢度，羽姬突然將目光放到我身後。我即刻轉身，見到有三個人喺遠處行緊過嚟……阿琪、Lincoln同埋Fiona。
「太好喇。」阿琪見到我即刻感觸起嚟，「我哋五個總算可以聚集返……」
羽姬見到其他人之後就冇再交代落去。我並冇急於追問，反正仲有其他疑問可以等其他人解答：
「我到底同你哋失散咗幾耐？」
「已經八個鐘。」回答我嘅係Lincoln。「呢段期間真係發生咗好多事……」
「見我哋出哂事，我諗飛機裡面班人應該都冇出到嚟喇？」
「嗯……」羽姬點了點頭，「Fiona，既然Rex已經返到嚟，老陶嘅狀況又已經好返少少，咁我哋而家應該點做？」
「當然係返去飛機裡面。」Fiona回應，「因為我哋已經搵到病毒。」
見到Fiona望住我，有一刻仲以為佢已經知道我成為咗「啟示病毒」嘅載體。
但我錯了……繼續聽佢講落去，先意識到事實好似係另一回事。
「阿琪佢……」Fiona繼續講落去。
「……將會係我哋解開詛咒嘅關鍵。」
（待續）
為咗唔洗唱首可怕嘅《忐忑》，我當然點都要找咗數先…
聽晚放埋下半集，記住畀 LIKE 同分享呀！
＝＝＝＝＝＝＝＝＝＝＝＝＝＝＝＝＝＝＝＝＝＝
FB： 有心無默
個人ac：（歡迎 follow ～）
https://www.facebook.com/myechoofheart
IG：echoofheart
【解悶良伴】
《絕命上映》
http://bit.ly/1XWiVud
《絕望走廊》
http://bit.ly/25qf91O
《西營盤》
http://bit.ly/27ZWrwN
《醉後的藍》
http://bit.ly/1Pekb4K
《無限次告白》
http://bit.ly/25PaQxi
《正負人生》
http://bit.ly/290huFB
《時間守衡者》
http://bit.ly/29l7aIZ
《同居貓物語》
http://bit.ly/29B6JL1
【情人節中伏系列】《飄浮的眼淚》
http://bit.ly/29E6mmx
【情人節中伏系列】《心的謊言》
http://bit.ly/29UiOd3
《最近距離的來信》
http://bit.ly/2bxNXtI
Search